Naga-abot sa 23 nga indibidwal ro una eon sa maayos nga kahimtangan matapos ro banggaan sa tunga it sangka van ag SUV sa pakurbadang parte it national highway nga sakop it Barangay Ili Sur, San Juan, La Union.
Base sa report, ro SUV hay ginamaneho it sangka 13-anyos nga dalagita, Grade 7 student ag residente it La Union.
Kaibahan nana sa saeakyan ro sambilog pang menor de edad nga 14-anyos.
Ro van, nga may sakay nga 21 nga pasahero kaibahan ro drayber hay naghalin sa Metro Manila ag maga-agto kunta sa nasambit nga lugar.
Suno kay PMAJ Reynante Organista, hepe it San Juan PNP, base sa paunang imbestigasyon, ro SUV hay umagaw sa pihak nga linya it karsada nga nagresulta sa pagbunggo kara sa nagapaabot nga van.
Natabu ro aksidente bandang alas-5:14 a.m. sa sangka pakurbadang parte it karsada.
Insigidang gindaea sa pinakamaeapit nga ospital ro tanan nga mga naninahan ag sa mayad nga swerte hay una eon sa maayos nga sitwasyon.
Samtang, sa kustodiya eon it Municipal Social Welfare and Development Office (MSWDO) ro menor de edad nga driver samtang nagapadayun ro imbestigasyon sa insidente.
