MALINAO, Aklan — Gin-abandona maskin nga bukon pa it tapos ro sangka flood control project sa Brgy. Banay-banay, Malinao.
Suno kay Punong Barangay Jowen Restar it nasambit nga lugar nga umpisa ko hapon Martes, Setyembre 9 hay amat-amat eon nga gin-pull-out ro mga equipment sa construction site.
Ro kontratista it proyekto hay ro St. Matthew General Contractor and Development Corporation nga ginapanag-iyahan it pamilya Discaya.
Madumduman nga nagisa it husto sa Senado ag Kamara ro mga Discaya angot sa mga maanomalyang proyekto para sa flood control.
Ro proyekto hay sangka revetment wall nga may haba nga masobra sa 700 meters bilang pangsagang sa baha kada tag-uean.
Natapos eon man sigon ro phase 1 and 2 it proyekto ag presente nga gina-construct ro phase 3 apang gulping ginpapundo sa indi masayuran nga rason.
Ginpahayag ni Kapitan Restar nga mabahoe kunta raya nga proteksyon it mga residente sa andang lugar ag kaiping nga 6 nga iba pa nga mga barangay sa pagbaha kada naga-eapaw ro Aklan River.
Sa pag-usisa it Bombo News Team, makita sa project board nga ro proyekto hay may pondo nga masobra sa P78 milyon ag gin-umpisahan ko Marso 19, 2025 ag ro date of completion hay sa February 2, 2026.
Temporaryo sigon raya nga napundo bangud sa banning period kasunod it ginpatigayon nga midterm elections ko Mayo ag uman nga nagbalik ro trabaho ko buean it Hulyo.
Samtang, ginatugyan ni Kapitan Restar sa DPWH Aklan District Engineering Office ro pagsabat sa iba pang detalye it proyekto.
Sa pihak kara, ginapangamuyo sigon nanda nga mapadayun ro proyekto bangud sa pagkabaeaka sa padayun nga nagatinaas nga lebel it tubi baha nga naga abot eon it hasta hawak tuga it climate change.
