KALIBO, Aklan — Seryoso, apang medyu may kamatuoran ro naging pahayag ni Senador Aimee Marcos nga nagagamit it illegal nga droga ro anang igmanghud nga si Pangueong Ferdinand “Bongbong” Marcos, Jr.
Raya hay natabu sa anang diskurso sa ikaywang adlaw it anti-corruption rally it mga leader ag miyembro it Iglesia Ni Cristo, gabi-i it Lunes.
Suno kay Atty. Harry Sucgang, political analyst sa Aklan nga 78 porsiyento nga may kamatuoran ro pahayag ni Senador Aimee.
Makabig sigon raya nga “declaration against interest” ukon kontra sa pamilya ro anang statement bangud nga imaw mismo ro nagbagsak sa anang kaugalingon nga igmanghud eakip ro anang asawa nga si First Lady Liza Araneta-Marcos.
Sa pihak kara, nagapati si Atty. Sucgang nga dapat nga i-set-aside ro mga personal nga isyu it pangueo kon owa man raya naga-apekto sa anang trabaho.
Sa baylo dapat nga tutukan ro isyu nga nagaputos sa Pilipinas partikular ro nagakatabu nga maeapnagon nga korapsyon eabi eon sa nabulgar nga flood control projects .
