KALIBO, Aklan — Nagaeaum si Sangguniang Bayan member Raymar Rebaldo nga maaprubahan eon ro anang ginaduso nga halin sa tatlong dag-on hay obrahon nga limang dag-on ro renewal it prangkisa it tricycle sa banwa it Kalibo.
Suno kana nga makapilang beses nana nga ginduso ro nasambit nga proposisyon, apang pirmeng napas-eawan.
Apang sa makaron hay co-author sigon nana si Vice Mayor Philip Kimpo ag may pilang SB members ro nagpahayag it interes nga maging co-sponsor.
Posible suno kana nga sa masunod nga domingo hay matalalay nanda ro anang proposal nga 5-years extension it franchise validity.
Engkaso nga maging ordinansa, ginpahayag ni Rebaldo nga mapa-ugan kara ro gastos ag disturbo sa mga tricycle operators ag drivers.
Mas magiging maugan ro proseso bangud kada limang dag-on eon ro pag-renew it prangkisa.
Kumpiyansa man imaw nga kon makahingabot, posibleng sa Enero 2026 hay mapatuman eon ro ginaduso nga ordinansa.
Samtang, angot sa baeayran sa renewal, pagatalakayon sigon raya sa committee hearing ag igaplastar sa igapatawag nga public hearing .
