BORACAY, Island — Opisyal nga ginsug-aeaw sa isla it Boracay ro kauna-unahang cruise ship arrival it 2026 matapos nag-abot ro MV Luminara sa maiden call ko Enero 17, 2026.
Ginpatigayon ro sangka plaque exchange ceremony sakay it barko bilang pagpasaeamat it LGU-Malay sa pagpili it MV Luminara sa Boracay bilang destinasyon it mga pasahero kara.
Ginpangunahan ro seremonya it gobyerno probinsyal it Aklan sa pagpamuno ni Gov. Jose Enrique M. Miraflores, kabulig ro lokal nga gobyerno it Malay sa idaeom ni Mayor Frolibar Bautista.
Nagtambong man ro mga representante sa Department of Tourism Region VI, Philippine Ports Authority, ag mga nagapangunang tourism stakeholders.
Ro pag-abot it MV Luminara ro unang cruise ship call it Boracay makaron nga dag-on nga may ginaeauman nga ap-at pang cruise ship arrivals sa Enero.
Padayon mat-a nga ginapalig-on it LGU-Malay, kabulig ro gobyerno probinsyal it Aklan ag pribadong sektor, ro posisyon it Boracay bilang nagapangunang cruise tourism destination samtang ginaduso ro responsable ag napabilin nga turismo.
