KALIBO, Aklan — Kasunod it mga batikos ag puna sa gintakod nga arko sa bukana it Pook jetty port, ginpakamayad nga raya hay kakason eon lang.
Suno kay Sangguniang Bayan member Ronald Marte, Chairperson it Committee on Tourism ag proponent it proyekto nga maskin imaw hay nadismaya sa gin-obra nga design bangud nga owa raya nakasunod sa plano nga butangan it piña sa kilid it kataga nga “Kalibo” agud nga maipakita nga una sa nasambit nga lugar ro piña industry ag tourism hub.
Base pa suno kana sa original nga plano, gina-install kunta ro welcome arch sa bukana it Kalibo International Airport rason nga ro address it proyekto hay Jaime Cardinal Sin Avenue, Brgy. Pook, Kalibo.
Apang bangud nga nagbutang man it arko ro pamunuan it Civil Aviation Authority of the Philippines (CAAP) hay gin-transfer nanda raya sa may jetty port.
Ginklaru man nana nga nagproponer eamang imaw it proyekto pinaagi sa anang gindihon nga resolusyon ag nakadepende eon sa kontraktor ag iba pang natungdan nga taeatapan it munisipyo ro pag-construct ag pagbutang it design.
Samtang, ginpahayag ni Marte nga paga-ayuson anay it Municipal Engineering Office ro anang design antes nga igabalik it uman.
Apang nagakangawa sigon imaw bangud nga naga-demand it dugang nga P800,000 sa pondo.
Nasayuran nga ro proyekto hay may nakataeana nga pondo nga haeos P1 milyon nga naghalin sa SPA – 20% Development Fund Calenadar Year 2024.
Naging viral raya bangud sa mga letra nga masyadong maisot ag magkabilaan rason nga indi masyadong mabasahan ro kataga nga Kalibo.
