KALIBO, Aklan — Nakaplastar eon ro nagkaeain-eain nga aktibidad it Bureau of Fire Protection (BFP) Kalibo para sa pagdumdum it nasyon sa Fire Prevention Month sa maabot nga buean it Marso.
Ginpahayag ni Fire Senior Inspector Delsie de Borja, fire marshall it BFP-Kalibo nga ro nasambit nga mga aktibidad hay ginpaabot eon nanda sa lokal nga gobyerno it Kalibo.
Kaibahan kara ro “Bumbero Free Papogi,” kun sa siin target nanda ro mga tricycle drivers it nagkaeain-eain nga Tricycle Operators and Drivers’ Association bangud nga sanda ro kaeabanan nga nakakasaksi it mga aksidente sa daeanon.
Mag-eowas nga maka-angkon it libreng bueog ukon hair cut hay igapaidaeum man sanda sa mga basic trainings angot sa first aid.
Dugang pa ro kasayuran angot sa kaeowasan kontra sa sunog.
Fire Senior Inspector Delsie de Borja, fire marshall it BFP-Kalibo
Sa pihak nga parte, ginpahayag pa ni de Borja nga nakipag-angot eon man sanda sa Liga ng mga Barangay para sa uman nga pagpatigayon it Fire Olympics.
Ro mga natumod nga barangay nga kaibahan kara hay ro Bakhaw Sur, Briones, New Buswang, Caano, Linabuan Norte, Nalook ag Pook.
Gindesisyunan sigon nanda nga pitong barangay eamang ro makapasakop sa Fire Olympics agud nga mas nga ma-intensify ro pag-training kanda .
Pinaagi suno kana sa nagkaeain-eain nga kategorya hay masukat kon ano kahaum ro ikasarang it mga barangay officials sa pagsabat sa anuman nga mga kalamidad.
Samtang, kada fire prevention month man sigon hay naka-heightened alert status ro andang taeatapan.
