Ginahueat pa ni Sangguniang Bayan member Raymar Rebaldo ro sabat it Municipal Engineering Office sa anang gindihon nga draft resolution angot sa ginareklamong mabaho nga public comfort room sa Kalibo Pastrana Park.
Suno kana nga owa pa it sabat ro nasambit nga taeatapan sa anang ginpaabot nga concern.
Sa anang pag-usisa, ginpaabot sigon it mga nagabantay sa nasambit nga public CR nga owa sanda it anuman nga nabaton nga reklamo ko una, apang umpisa nga gin-construct ro drainage system sa lugar hay naka-eksperyensiya it mabaho nga hugum.
Posible suno kay SB Rebaldo nga nakaangkon it diperensiya ro construcrtion nga imaw ro anang ginapa-usisa sa engineering office.
Makarondaya man sigon ro natabu sa gin-construct nga drainage system sa Crossing Banga-New Washington nga imbes nga masolusyunan ro mga nagakatabu nga pagbaha hay mas pa nga nag-grabe ro sitwasyon.
Owa sigon nana ginabasoe ro contractor it proyekto, apang ro problema hay ro kawad-an it drainage master plan.
Nag-ugat ro isyu matapos nga gina alegar nga gin-akigan it sangka naggamit it public CR ro mga nagabantay bangud sa indi matakuran nga hugum, kun sa siin , nagbayad pa imaw it P10.
Handum sigon ni Rebaldo nga makaangkon it malimpyo, maayos ag presentableng CR sa Kalibo Pastrana Park nga kaeabanan nga ginagamit kon may mga mabahoe nga event kapareho it Opening Salvo, mismong Ati-Atihan festival ag iba pa.
Ginbulgar pa ni Rebaldo nga sa operasyon it CR ko nagtaliwan nga dag-on hay nakakolekta ro munisipyo it haeos tunga sa milyong piso.
