KALIBO, Aklan—Nagapabilin nga mabaskog nga armas ro radyo para sa pag-umwad it mga pumueuyu.
Raya hay bangud sa tumaeagsahon nga ikasarang it radyo nga maabot ro maabu nga mga tagpaeamati sa nagkaeain-eain nga parte it kalibutan.
Suno kay Malay sangguniang bayan member ag dating Kapisanan ng mga Broadcaster ng Pilipinas ukon KBP Aklan chapter Alan Palma Sr., nga maskin nga nagapangibabaw makaron ro modernisasyon ag internet ukon social media, ro radyo hay nagapabilin nga mapuslanon nga ginahalinan it impormasyon ag balita bangud nga nakakaabot ro signal kara maskin sa mga maeayo nga lugar.
Sa pihak kara, masubo suno kana nga maabu nga mga broadcaster ukon komentarista sa radyo ro nakaka-eksperyensiya it pagpamaeag ag kinagamo tuga it pagbatikos sa mga naga-abuso sa posisyon ag mga gamhanan sa sosyudad.
Owa it kahadlok nga nagapamaeag agud nga pahipuson ro mga katapo it media.
Raya hay nagapamatuod nga mabaskog ro impluwensiya it radyo sa pagbilog it opinyon it tawo.
Samtang, gindugang pa ni palma nga maskin sa anang pagiging public servant makaron, padayun imaw nga nagaserbi bilang mata, dueunggan ag baba it publiko sa sueod it konseho kapareho it anang karakter dati bilang media man nga nagatindog bilang watchdog.
Samtang, laygay ni SB member Palma sa mga katapo it media sa aklan nga maging credible, patas ag masaligan pinaagi sa pagbalita it kamatuoran, balanseng pagtalakay sa mga isyu, ag responsableng paggamit it impormasyon.
Madumduman nga ginaselebrar ro World Radio Day makaron nga adlaw, Pebrero 13 nga ginproklama it mga miyembrong estado it United Nations Educational, Scientific and Cultural Organization ukon UNESCO ko 2011.
