Sangka proposed bill ro ginpasaka ni House Majority Leader ag Ilocos Norte Rep. Sandro Marcos nga nagatuyo nga obrahon nga krimen ag mapapanaugan it penalidad ro mga government contractor nga ro mga proyekto hay mapamatud-an nga substandard ukon owa it kalidad.
Sa House Bill No. 2811 ukon Criminalizing Negligent Contractors Act nga gin-author ni Marcos, masiguro nga ro mga proyektong igapatindog nga ginpondohan it gobyerno hay maayos bangud nga ro maga-eabag nga contractor hay insigidang mapresu.
Ginahayag ni Marcos nga tiempo eon agud nga pasabton ro mga pabayang contractor nga nagasueod sa government projects apang bagsak ro mga gina-obrang proyekto ag ro handum eamang hay magkamkam it kwarta.
Ginpamilit ni Marcos nga investment it gobyerno ro mga government infrastructure projects rason nga tama eamang nga masiguro nga ro milyong pondong gintaeana kara hay maayos nga proyekto ro kabaylo.
Sa idaeum it proposisyon, ro sin-o mang contractor, subcontractor, corporate officer, government employee, o juridical entity nga mapamatud-an nga nagpabaya, raya man hay nagsirbing principal, accomplice, o accessory hay pagapapanaugan it penalidad nga pagkakulong it an-um hasta 12 anyos ag multang P10 million.
Mag-eowas pa kara ro penalidad nga perpetual disqualification sa pagsueod sa anumang government procurement o project.
Suno kay Marcos, klaru sa konstitusyon ro “accountability,” bukon eamang sa korupsiyon kundi maging sa gross negligence nga nagresulta sa pagwaldas it pondo bangud sa mga substandard nga proyekto.
