Ginkumpirma ni Vice President Sara Duterte nga ko nagtaliwan nga dag-on pa hay may na-recruit eon imaw nga indibidwal agud nga maging running mate para sa 2028 national elections.
Sa pihak kara, nagpamalibad pa anay si Duterte nga ibulgar ro pangaean it nasambit nga indibidwal agud nga raya hay protektahan .
Kat kutan-on kon magiging unifying ukon vengeful leader baea raya, ginpahayag ni Duterte nga ro anang gin-recruit ro anang pagapahueagon agud nga mapasabat ro mga nakaangkon it saea sa nasyon agud nga maka-focus imaw sa anang trabaho bilang presidente.
Nauna eon nga gin-anunsyo ni VP Sara ro anang desisyon nga magpadaeagan sa 2028 presidential elections.
Suno kana nga owa nana ginhambae sa anang amang si dating Pangueong Rodrigo Duterte ag sa anang mga igmanghud nga temprano imaw nga magadeklara it anang kandidatura.
Ro ana eamang nga asawa, mga unga, inang si Elizabeth Zimmerman ag sangka staff nga nag-translate it anang speech sa Tagalog, ro nakasayod it anang paga-obrahon nga anunsiyo.
Dugang pa kara nga ro mga abogado eon lang it anang ama ro nag-imporma kara angot sa anang anunsiyo.
Nagtau man sigon raya sa mga abogado it matag-od nga mensahe apang nagpamalibad nga ibulgar ro kaundan bangud nga magapangayo anay imaw it permiso sa ama ag sa anang mga abogado.
