Pormal nga gintumod it prosecution team it International Criminal Court (ICC) ro pilang matag-as nga presente ag dating opisyal it Pilipinas bilang mga co-perpetrators sigon ukon kasabwat ni dating Pangueong Rodrigo Duterte sa kontrobersiyal nga kampanya kontra ilegal nga droga.
Sa pagpadayon it pagpamati it pangkalibutanong tribunal, partikular nga gin tigsambilog ni ICC Trial Lawyer Robynne Croft ro mga nagpangunang opisyal nga gumanap it importanteng papel sa pagpatuman it madugong war on drugs it nakataliwan nga administrasyon.
Kaibahan sa mga lantarang ginpangaeanan sa kapueungan sanday dating Philippine National Police (PNP) Chief ag presenteng Senador Ronald “Bato” Dela Rosa, Senador Christopher “Bong” Go, ag dating Department of Justice (DOJ) Secretary Vitaliano Aguirre II.
Ro pagtumod sa mga co-perpetrator hay sangka importanteng tikang it taga-usig agud pamatud-an nga ro serye it mga pagpatay hay bukon eamang it kaugalingon nga desisyon it dating presidente kundi may koordinasyon ag direktang partisipasyon halin sa anang mga ginasaligan nga opisyal.
