Nagpadumdom si Senador Bam Aquino sa gobyerno nga ginapasugtan it Tax Reform for Acceleration and Inclusion (TRAIN) Law ro awtomatikong suspension it excise taxes sa produktong petrolyo kon umabot ro presyo it langis sa world market it $80 kada bariles.
Sa nasambit nga probisyon, nga ginduso ni Aquino, awtomatikong ginapondo ro pagpangolekta it excise tax sa produktong petrolyo kon umabot ro average price it langis sa global market it $80 kada bariles masunod nga tatlong buean.
Nagpaandam ro senador nga ro pagtaas it presyo it langis hay magatuga it domino effect sa presyo it pagkaon ag iba pang baeak-eon, nga magapabug-at pa sa paeas-anon it mga Pilipino.
Nagdihon si Aquino it Senate Bill No. 265 nga nagatuyong dueaon ro excise tax sa diesel, kerosene, liquefied petroleum gas (LPG), fuel oil, ag unleaded gasoline nga gin-imponer sa idaeom it TRAIN Law.
Kon maisalaye, gin-insister ni Aquino nga magatao ro hagna it insigidang kasoehayan sa mga commuter ag driver, kapin eon sa saeakyang nagagamit it diesel kaparehas it jeepney, bus, ag delivery vehicle.
Magatuga man raya it mas manabang gaeastuson it mga kabaeayan sa pag-eaha ag iwag, kapin eon sa kubos ag off-grid nga komunidad, ag makabawas sa gastos sa gasolina ag logistics it mga producer ag maintok nga negosyo.
