Ginlaygayan it Philippine Atmospheric, Geophysical and Astronomical Services Administration (PAGASA) ro publiko nga mag-dahan sa ginaeauman nga mas mainit nga paniempo ag mataas nga heat index sa pilang parte it nasyon umpisa makaron nga Marso hasta sa Mayo daea it mas mabaskog nga easterlies.
Suno kay Nathaniel Servando, administrador it PAGASA, bukon it El Niño ro rason it pagtaas it temperatura bangud nga nabatyagan sa gihapon ro La Niña sa makaron.
Dugang pa nana nga padayun man nga naeksperyensiyahan ro mga bugso it northeast monsoon ukon “amihan,” ag posibleng ideklara ro pagtapos it amihan season sa ikatlo ukon ika-ap-at nga domingo it Marso.
Ginpahayag ni Servando nga posibleng mag-abot sa katung-anan it 28°C sa Cordillera hasta 37.9°C sa Cagayan Valley ro temperatura makaron nga buean.
Ginaeauman man ro mas mataas nga heat index sa Palawan, Panay Island partikular sa Iloilo, Negros Island, ag iba pang baybayong lugar nga may mataas nga humidity. Posibleng mag-abot ro heat index halin sa caution hasta sa danger level.
Base sa heat index chart it PAGASA, kaibahan sa Caution level ro 27°C hasta sa 32°C; Extreme Caution, 33°C hasta sa 41°C; Danger, 42°C hasta sa 51°C; ag Extreme Danger, 52°C.
Gin-engganyo man ni Servando ro publiko na sundon ro mga abiso it Bureau of Fire Protection bangud saFire Prevention Month ro Marso.
Paandam pa nana, umpisa sa Abril hasta sa unang parte it Mayo, mas maarbung lugar ro posibleng maka-eksperyensiya it extreme caution hasta danger-level heat index, ag may pilang lugar eabi eon sa mga baybayong lugar ag highly urbanized cities nga posibleng umabot sa extreme danger level.
