Nagtau it dungog sa probinsiya it Aklan ro daywang unga nga estudyante matapos sanda nga magdaog sa Singapore Math Global Finals 2026 nga ginpatigayon kan-o eamang.
Ginkilaea ro gold awardee nga si Maddox Flynn Roldan Sison, Grade 1 ag bronze awardee si Laijohn Jacob Daroy Jimenez, Grade 3, parehong estudyante it Infant Jesus Academy sa banwa it Kalibo.
Ro daywa hay nagpakitang-gilas sa prestihiyosong international math competition pinaagi sa online, kun sa siin naka-engkwentru nanda ro iba pang mga estudyante halin sa nagkaeain-eain nga nasyon.
Ginpakita nanda ro andang kamayad sa problem-solving ag analytical skills kontra sa iba pang mga nagpasakop nga estudyante sa bilog nga kalibutan.
Ro Singapore Math Global Finals hay sangka pangkalibutanon nga kompetisyon nga bukas sa mga piling estudyanteng nakapasa sa mga naunang qualifying rounds, nga nagatuyo nga sukaton ro ikasarang it mga pamatan-on sa Math sa international standards.
Samtang, ginpahayag ni Ian Sison, ama ni Maddox it banwa it Numancia nga sa batang edad hay nakitaan nanda it kamayad sa Math ro anang unga nga namana sigon kara sa anang ina nga dati man nga nagapasakop sa mga Math competitions.
Bilang unga, ginapasugtan sigon nanda raya nga maghampang, apang pag-abot sa oras it review hay ginatutukan nanda raya.
Dugang pa nga padayun nanda nga pagasuportahan ro andang unga sa pagsabak sa iba pang mga international competitions.
Mag-eowas sa andang eskwelahan, ginapabugae man it lokal nga gobyermo it Aklan ro kadaeag-an it daywang unga kun sa siin dikara makita nga masarangan nga makipagsabayan it mga inunga halin sa Aklan sa global stage.
