Nagpaandam ro Presidential Communications Office (PCO) kontra sa pag-eapnaag it saea nga impormasyon nga ginasamantala ro presenteng sitwasyon sa enerhiya sa nasyon.
Sa pahayag ni PCO Secretary Dave Gomez, ginpahayag nana nga magapanabat sa idaeom it laye ro sin-o mang hungod nga nagahimo ag nagapakalhit it pekeng balita online.
Ginpadumdom ni Secretary Gomez nga ro pagpakalhit it “fake news” hay may penalidad nga hasta sa an-om nga buean nga pagkakulong sandig sa Revised Penal Code.
Kon ginhimo raya online, magadoble ro penalidad sa idaeom it Cybercrime Prevention Act.
Suno pa kay Gomez, ro disinformation hay nagasamad sa kumpyansa it publiko, nagapahina sa ekonomiya, ag nagabutang sa peligro sa kapakanan it pumueoyo kapin eon sa tunga it hangkat sa enerhiya.
Ginpunto nana nga uwa it pagapaeampason ro gobyerno kontra sa mga hungod nga nagapakalhit it saea nga impormasyon para sa pangkaugalingon ukon pampulitikang interes.
Ginpahayag it opisyal nga makipag-angot ro PCO sa Department of Justice (DOJ) agud magpasaka it kaso kontra sa mga mapamatud-ang nagapakalhit it mapanlinlang nga impormasyon ag nagamanipula it merkado.
