Naglunsar ro Bureau of Fisheries and Aquatic Resources (BFAR) sa Western Visayas it P7.33-milyong Salt Industry Project (SIP) agud buhion ro nagahina nga lokal nga produksyon it asin ag mabuhinan ro pagdepende it nasyon sa ginaimport nga suplay.
Sa makaron, nagadepende ro Pilipinas sa 99% imported nga asin samtang ro produksyon sa rehiyon hay kapin sa 5,447 metric tons eamang nga katumbas it 33% nga kinahang-eanon it mga kabaeayan.
Tuyo it programa nga pataason ro produksyon, ayuson ro kalidad, ag magtao it dugang nga pangabuhian sa mga mangingisda.// suno kay BFAR Region 6 director Remia Aparri, pagasuportahan it proyekto ro siyam nga benepisyaryong mangingisda sa pinaagi it makabag-ong kagamitan ag materyales.
Kaibahan ro modernisasyon kaparehas sa paggamit it HDPE packaging, mas maayos nga tambakan, ag pag-ensayo sa food safety standards agud maging competitive ro lokal nga asin.
Pangatlo ro Western Visayas sa produksyon it asin sa nasyon apang mas manaba sa 10% ro bulig kara sa kabilugang suplay.
Nagapabilin nga nagapangunang tagaproduksyon ro Guimaras, samtang nagapadayon ro tradisyunal nga paghimo it asin sa Iloilo ag Antique.
Nagaeaum ro BFAR nga sa pinaagi it proyekto hay uman nga magapagsik ro lokal nga industriya it asin ag maengganyo ro mga bumaeakae nga tangkilikon ro produktong kaugalingon naton.
