Nailista ro pagnaba it ilegal, uwa naireport ag bukon it regulated nga pagpangisda sa Western Visayas ko 2025, kadungan sa pagtaas it produksyon it isda sa kapin 53,000 metriko tonelada suno sa Bureau of Fisheries and Aquatic Resources (BFAR).
Suno kay Regional Director Remia Aparri, resulta raya it mas hugot nga pagpatuman it laye, closed fishing season, ag paggamit it makabag-ong monitoring system.
Apang, ginpahayag kara nga inde pa pwedeng ideklarang illegal, unreported, and unregulated ukon IUU-free ro rehiyon.
Padayon gihapon nga hangkat ro ilegal nga pagpangisda, bangud sa may pilang operator nga nagagamit it pekeng permit ag “front” operations agud makalikaw sa awtoridad.
Nagapabilin man ro pagsueod it mga mangingisda halin sa ibang lugar kaparehas it Cebu ag Masbate sa municipal waters, nga kilaea bilang “pangayaw.”
Agud nga masolusyunan raya, ginapabaskog it BFAR ro kampanya sa edukasyon ag alternatibong pangabuhian, mag-eowas sa mas ginpabaskog nga pagpatrolya sa bulig it inter-agency task force kaibahan ro Navy ag Coast Guard.
Ginpaeapad man ro paggamit it Vessel Monitoring System (VMS) agud matumod ro hueag it mga barko ag malikawan ro ilegal nga aktibidad.
Ginpunto it BFAR nga importante ro tayuyon nga pagpatuman it laye, koordinasyon it mga ahensya, ag pakikipagbuligan it komunidad agud daeayon nga matapna ro ilegal nga pagpangisda ag mapabilin ro dunang manggad it rehiyon.
