Magapangatubang sa reklamong pag-eabag sa Republic Act 9165 ukon Comprehensive Dangerous Drugs Act of 2002 ro sangka laborer matapos nga madakpan sa ginpatigayon nga drug buy-bust operation it gintingob nga pwersa it Provincial Drug Enforcement Unit ukon PDEU Aklan ag Lezo Municipal Police Station sa Brgy. Sta. Cruz, Lezo.
Ginkilaea ni PCapt. Donnie Magbanua, hepe it Lezo Municipal Police Station ro subject person nga si alyas “jun-jun” 38-anyos ag residente it nasambit nga lugar.
Nabak-ean imaw it sangka sachet it suspected shabu kabaylo it P1,000 pesos nga buy-bust money.
Samtang, sa pagbody search kana it pulisya, nabuoe dugang ro ap-at pang ka sachet it suspected illegal drugs.
Suno pa kay PCapt. Magbanua, kapin sa tatlong buean ro pagmonitor ag validate kay “jun-jun” antes nga ginkasa ro operasyon nga nagresulta sa madinaeag-on nga pagkaaresto kana.
Angot kara, ginpadumdom ni PCapt. Magbanua ro mga indibidwal nga nagaduso ag hana pang magduso it illegal nga droga nga likawan eon ro nasambit nga bisyo ag illegal nga hilimuon agud nga inde maghimas it maeamig nga rehas bangud nga puspusan ro pagtrabaho it mga awtoridad agud nga madakpan ro tanan nga nagahimo it kaparehas kara nga illegal nga aktibidad.
