Nagpahayag it pagkabaeaka ro Boracay Foundation Inc. (BFI) sa planong Boracay Bridge sa pinaagi it pagsueat kay Pangueong Ferdinand Marcos Jr., bangud sa posibleng epekto kara sa kalikasan ag pangabuhian sa isla.
Suno sa BFI, ro proyekto hay pwedeng makasamad sa natural nga klase it isla it Boracay ag magatuga it strain sa sensitibong ecosystem.
Kaibahan sa mga isyung ginsambit hay ro posibleng epekto sa coastal processes kaparehas it water circulation, paghueag it baeas, kalig-unan it baybayon ag mga importanteng factor sa pagpabilin it sikat nga white sand beaches it isla.
Ginpahayag man it grupo ro kabaeaka sa epekto kara sa pangabuhian it mga transport workers, tourism employees ag maintok nga negosyante nga nagasalig sa presenteng sistema it transportasyon.
Suno pa sa BFI, may una eon nga maayos nga maritime transport network ro Boracay nga nagaserbi sa mga residente ag turista, rason nga inde eon kinahang-ean ro tulay.
Ginbatikos man nanda ro kakueangan it konsultasyon sa lokal nga komunidad ag gin-insister ro importansya it mas inklusibong pagpasakop it stakeholders antes ipatuman ro maeagkuang proyekto.
Nagpanawagan man ro grupo para sa updated, independent, ag science-based Environmental Impact Assessment agud magserbing giya sa desisyon.
Sa pihak it pagpamaeabag, ginkumpirma it Office of the President nga nabaton eon ro sueat ag ginpasa raya sa natungdan nga ahensya para sa pag-usisa.
Ginpunto it BFI nga ro Boracay hay bukon eamang it lugar para sa imprastruktura kundi simbolo man it environmental recovery, kalig-unan it komunidad, ag sustainable tourism.
