Ginpaathag it Management it Ibajay District Hospital nga indi sanda pwede magpa-unga it high risk pregnancy, sandig sa regulasyon it Department of Health (DOH).
Raya hay angot sa insidente it pagkamatay ni Sheryl Florendo ag it anang eapsag sa sueod it anang tiyan.
Suno kay Dr. Mary Jean Gelito, Chief of Hospital it nasambit nga taeatapan, bangud sa mataas nga peligro sa anang pag-unga, mandatory sigon nga i-halin raya sa mas mataas nga pasilidad nga kun siin nga may kapasidad nga may andang Neonatal ICU ag iba pang serbisyo para sa kaeuwasan it mag-ina.
Dugang pa kara, uwa sigon sanda it kakayahan nga mag-manage it pasyente nga pre-mature ro eapsag.
Ginklaro man nanda nga ro pag-refer sa ibang ospital hay uwa nagakahueugan it pagbalibad kundi raya hay para ma-salbar ro mag-ina sa kaeainan.
Paathag dugang nga insigida nga gin-usisa it management ro natabo, kun sa siin nag-request sanda it incident report para iplastar ro insakto nga hitabo.
Nagpatigayon man sigon sanda it meeting kaibahan ro ibang staffs it ospital para mabusisi kun may kakueangan sa andang parte.
Nagapati sigon ro management nga ginhimo nanda ro kutob sa mando it DOH nga mandatory referral para sa nasambit nga pasyente.
Samtang, ginklaro man ni Dr. Mary Jean Gelito nga ro pag-panukot hay standard procedure it ospital kun sa siin ipakita ro billing sa pamilya it pasyente, apang kun nagahambae man sigon nga uwa it ikasarang hay uwa man nanda napilita nga mag-bayad.
Gina-remedyuhan lang sigon raya pinaagi sa pagpaperma it promisory note ag uwa raya gina-hold kun indi makabayad. Sa ambulansya mat-a, ginpaathag nga may budget para kara apang kinahnagean man nga mapabayran sa mga pasyente nga naga-gamit kun masarangan nanda bangud nga ginabakae man sigon ro krudo.
Ginklaro man nanda nga ginpapili ro pamilya kun ambulansya it ospital ukon rescue vehicle, kun sa siin gin-pili sigon it asawa nga rescue vehicle eon lang it MDRRMC ro gamiton bangud nga raya hay libre.
