Ginkumpirma ni Department of the Interior and Local Government (DILG) Secretary Jonvic Remulla nga euwas si Senador Ronald “Bato” dela Rosa ag may kaibahan nga security personnel kasunod it tensiyon ag lockdown sa Senado.
Sa anang pag-atubang sa mga katapo it media sa Senado, ginphayaga it opisyal nga ginpasayod nanda kay Dela Rosa nga idto sanda sa Senado para i-secure ro integridad it Senado ag proteksiyon it tanan nga mga senador nga una sa sueod it istraktura.
Ginsigurado man ni Remulla kay dela Rosa nga indi nanda imaw arestuhon.
Una kara, nabulabog ro Senado matapos mabatian ro mga eupok it baril gabie it adlaw it Miyerkules, Mayo 13 samtang naka-lockdown ro Mataas nga Kapueungan, kun siin presenteng nakaidaeom sa protective custody ro senador.
Suno kay Remulla, presente nandang gina-imbestigahan ro mga pagkatawo it mga una sa likod it serye it pagpamaril.
Natabo ro tensiyon sa Senado matapos nga uwa magpaguwa ro Korte Suprema it temporary restraining order (TRO), nga ginhinyo ni Dela Rosa sa tunga it arrest warrant halin sa International Criminal Court (ICC).
