Nagtau it senyales it pageaum ro balita nahanungod sa ebola sa Democratic Republic of Congo bangud may mga pasyente nga nagmayad eon sa nasambit nga sakit.
Suno sa WHO, ap-at nga mga nurses ag sangka laboratory worker ro naka-recover eon ag nakaguwa eon sa ospital. Nagaeaum ro mga eksperto nga maabu pa ro magamayad kon temprano nga matumod ag mabueong ro mga pasyente.
Apang, nagapabilin nga seryoso ro sitwasyon bangud nga naga-abot eon sa 282 ro kumpirmado nga kaso it ebola sa Congo, ag 42 eon ro napatay. May una man nga 19 nga bag-ong kaso.
Ginakabaeak-an man it mga otoridad nga posible mag-eapta ro virus sa guwa it nasyon pinaagi sa mga tawo nga nagabiyahe. Sa São Paulo, gina-monitor ro sangka eaeaki nga taga-Congo matapos gin-eagnat. Nagpositibo raya sa meningitis, apang padayon pa nga gina-test para sa Ebola. Sa Rio de Janeiro, sambilog pang pasyente halin sa Uganda ro nagpositibo sa malaria, apang gina-test man sa ebola.
Suno kay Jean Kaseya, director-general it Africa Centres for Disease Control and Prevention, mataas ro peligro it madasig nga pageapta it virus sa nagkaeain-eain nga lugar.
Sa makaron, masobra 1,100 nga suspected cases ro andang gina-imbestigahan.
