Ginhinyo it mga prosecutor sa impeachment trial ni Vice President Sara Duterte nga mabuksan eon sa pre-trial stage ro kahong may sueod nga mga dokumento halin sa Bureau of Internal Revenue (BIR) para maimbentaryo ag mamarkahan bilang ebidensya antes mag-umpisa ro pagbista.
Kaibahan raya sa mga ginsumite nga hinyo it prosekusyon sa Senate Impeachment Court para mapadasig ro pagpamati it kaso.
Nagapabilin nga selyado ro kahon halin kat daehon raya sa mga pagpamati it House Justice Committee angot it impeachment complaint kontra kay Duterte.
Mageuwas kara, ginhinyo man it prosekusyon nga ipatigayon sa Filipino ukon Ingles ro pagkutana sa mga testigo agud mas madali nga maintindihan it publiko ro mga pagpamati.
Gusto man kara nga pasugtan ro pag-intra it parehong pampubliko ag pribadong prosecutor sa presentasyon it mga testigo.
Samtang, nagpasugot man ro prosekusyon sa proposisyong tatlong adlaw nga paunang abiso antes ipresenta ro sangka testigo para mataw-an it bastante nga tyempo ro pihak nga bahin nga maka-pahaom.
