Emosyunal nga ginpahayag ni Jake Mark Agodes, sambilog sa mga dating estudyante it Libacao College of Science and Technology (LCST), ro anang pagka-dismaya matapos masayuran nga bukon it accredited it Commision on Higher Education (CHED) ro nasambit nga eskwelahan.
Suno kana, sa umpisa hay naging maayos ro pagdumaea it eskwelahan, apang samtang nagabuhay hay nakabatyag sanda it pagduda.
Gineksplikar sigon kanda it sangka maestra nga bukon it buyot it CHED ro eskwelahan, apang uwa nana raya ginpatihan bangud ginahambae man it mga maestro nga naga-dunga sanda sa ibang eskwelahan.
Dugang pa nana, nakumpirma eamang nanda nga bukon it accredited it CHED ro nasambit nga eskwelahan kat sanda hay makatapos eon.
Nagpursige sigon imaw para nga matapos nana ro anang pag-tuon apang madja naadto eamang sa uwa matapos nga i-nullified ukon ginpawalang-bisa ro andang mga certificate nga ginbaton.
Paathag pa nana, apektado nga mayad ro anang mga plano kapin eon ro pagtrabaho sa ibang nasyon kun sa siin nakataeana eon kunta imaw nga mag-panaw makaron nga katapusan it buean.
Bangud kara, nag-hinyo si Agodes sa CHED nga ikonsiderar ro ap-at nga dag-on nga pag-tinguha ag pagpangabudlay it mga estudyante nga nagtapos sa LCST.
