Ginpaathag ni Dr. Philip Ian Prieto Padilla, sangka health expert, nga mas delikado ro paggamit it mga synthetic durgs bangud ginahimo raya sa mga pabrika ukon iligal nga laboratoryo ag may mas mabaskog nga epekto sa eawas kumpara sa natural nga mga substansya.
Bilang kaparte it pag-obserba sa International Day Against Drug Abuse and Illicit Trafficking, ginpahayag nana nga kaibahan sa mga pinakakilaea nga sintetiko nga droga sa Pilipinas ro shabu ukon methamphetamine ag MDMA, nga pareho nga nagastimular sa utok ag nervous system.
Suno pa kana, mahimo nga magtaas ro enerhiya, pagka-alerto ag sensibilidad it nagagamit, apang mahimo man raya nga magresulta sa pagkamaisog, hallucination, mataas nga presyon it dugo, problema sa tagipusuon, stroke, ukon atake sa tagipusuon.
Ginpahayag man ni Dr. Padilla nga may mabuhay nga epekto ro paggamit it sintetiko nga droga sa utok, atay, bato ag iba pa nga mga organo sa eawas bangud sa sobra nga pag-andar kara sa eawas.
Samtang may mga droga nga ginagamit sa medisina para sa magpamayad it baeatyagon sa eawas, migraine ag iba pa nga kondisyon, ginpaandam nana nga mahimo gihapon raya magresulta sa pagka-dependente ukon adiksyon kun bukon it tama ro paggamit ag pagdumaea.
Dugang pa kara, padayon nga ginabantayan it mga otoridad, kaibahan ro Philippine Drug Enforcement Agency (PDEA), ro mga iligal nga laboratoryo nga nagaprodusar it sintetiko nga droga sa nasyon agud mapunggan ro pagkalhit it iligal nga negosyo ag maprotektahan ro publiko sa peligro nga resulta it mga droga.
