Opisyal eon nga gindeklara it National Jury of Elections (JNE) sa Peru ro pagdaog ni Keiko Fujimori sa bag-o eamang natapos nga runoff presidential election.
Sa maisot nga abanse nga haeos 50,000 nga boto, ginpiyerde nana ro kaaway nga si Roberto Sánchez.
Nakabo-oe si Fujimori it 50.135% it boto kumpara sa 49.865% ni Sánchez, ag nakataeanang magapanumpa bilang pangueo sa Hulyo 28, 2026, kadungan it Araw ng Kalayaan it nasyon.
Raya eon ro ika-ap-at nga paghana ni Fujimori nga maging pangueo matapos mapiyerde ko 2011, 2016, ag 2021. Ro anang kampanya hay nakasentro sa pagtapna sa kriminalidad ag pagbalik it kaayusan sa nasyon.
Mabaskog ro suporta nana sa Lima ag mga botanteng sa ibang nasyon, samtang si Sánchez hay nakabo-oe it boto halin sa mga rural ag katutubong komunidad.
Si Keiko hay unga it dating pangueong si Alberto Fujimori, nga nakulong bangud sa korapsyon ag pageabag sa tawhanong kinamatarung.
Bangud kara, nagapabilin nga tunga ro opinyon it publiko sa anang pagdumea, may mga nagapati nga imaw ro magapanumbalik it kaayusan, samtang ro iba hay nagakabaeaka sa pagbalik it Fujimorismo.
Ro anang administrasyon hay nagapangatubang sa mabug-at nga hangkat sa kriminalidad, ekonomiya, ag padayun nga kinagamo nga pangpulitika.
