Ginpamilit ni Pangueong Ferdinand Marcos Jr., nga indi dapat maging sentro it banggi-anay ro West Philippine Sea kundi magapabilin nga dagat it kalinong, kooperasyon ag pangabuhian kadungan sa pagdumdum it ika-10 nga anibersaryo it kadaeag-an it Pilipinas sa West Philippine Sea Arbitral ruling.
Suno sa pangueo, ro kadaeag-an it Pilipinas hay bukon eamang it kadaeag-an sa idaeum it internasyonal nga laye, kundi kadaeag-an man it mga mangingisdang Pilipino ag mga banwa nga nagasalig sa kadagatan para sa andang pangabuhian.
Nagpanindugan man si Pangueong Marcos nga ro tensyon it mga bansa hay dapat maresolba sa malinong nga pamaagi ag base sa international law, bukon sa pagpamaeag ukon paggamit it puwersa.
Ginpasiguro man it pangueo nga magapabilin nga mabakod ro Pilipinas sa pagsunod sa United Nations Charter ag United Nations Convention on the Law of the Sea (UNCLOS), samtang padayun nga ginadepensahan ro kinamatarung ag interes it nasyon.
Nagpasaeamat man imaw sa mga nasyon nga padayun nga nagasuporta sa Pilipinas sa pagsakdag it sangka pangkalibutanon nga kaayusang nakabase sa laye.
Ginpangunahan it pangueo ro diplomatic reception sa Pasay City bilang pagdumdum sa ika-10 anibersaryo it Arbitral award, nga gintambungan it mga miyembro it diplomatic community, kaibahan sanday US Ambassador Lee Lipton, Japanese Ambassador Endo Kazuya, ag Senate President Sherwin Gatchalian.
