Ginhinyui it Estados Unidos sa Iran nga magpaguwa it opisyal nga pahayag nga ipabilin nga bukas ro Strait of Hormuz ag punduhon eon ro mga pag-atake sa mga barkong naga-agi sa ginakabig nga importanteng rutang pandagat.
Suno sa mataas nga opisyal it US, nabudlayan ro Washington nga mapabilin ro kasugtanan sa Tehran bangud sa ginasugid nga banggi-anay sa sueod it pamunuan it Iran. Ginpahayag pa nanda nga ro mga panibag-ong pag-atake sa mga barko hay posibleng himuon it sangka paksyon it mga hardliner nga gustong baeabagan ro ginapatuman nga ceasefire.
Ginpamilit ni US President Donald Trump nga magapadayun ro negosasyon sa Iran agud nga eubusan nga wakasan ro tensyon, apang ginklaru nga may limitadong tiempo eamang para sa pag-istorya ag haum ro Amerika nga maghimo it iba pang tikang kun raya hay mapas-eawan.
Samtang, ginpahayag it representante it Iran sa United Nations nga ro pagdumaea sa Strait of Hormuz hay sa eksklusibong gahum it Iran ag ginapamaeabagan ro anumang pagpasilabot it ibang nasyon. Ginpamilit man it Tehran ro kagustuhan kara nga makaangkon it eubus nga kontrol sa nasambit nga rutang pandagat.
Ginpamilit man it mga opisyal it US nga indi makaangkon it kasugtanan sa nuclear program it Iran hasta nga indi kara ipapundo ro mga pag-atake sa mga barko ag magsunod sa mga kondisyon it ceasefire. Padayun man nga ginasueong it Oman, Qatar ag Pakistan ro diplomasya samtang nagapabilin nga mataas ro tensyon sa Middle East.
