Magapangatubang sa kasong Reckless Imprudence Resulting in Homicide ro sangka tricycle driver matapos nga bungguan ro sangka 33-anyos nga rider nga naging rason it anang hinali nga kamatayon sa Crossing Banga-New Washington, bandang alas-9:21 it gabi-i it Huwebes, Hulyo 9.
Base sa imbestigasyon it kapulisan, halin ro biktima nga residente it Banga sa Osmeña Avenue paagto sa Toting Reyes Street sakay it anang motorsiklo kat mabungguan raya it sangka tricycle nga ginamaneho it 34 anyos nga eaeaki nga residente it C. Laserna St. Poblacion, Kalibo nga halin sa direksyon it D. Maagma Street paagto sa Jaime Cardinal Sin Avenue sa sangka intersection, kun sa siin, nataeupangdan nga owa naga-gana ro traffic signal.
Bangud sa kabaskog it pagkabunggo, inapok ro biktima ag napaeos ro anang suksok nga full-face helmet, nga nagtuga it grabeng lastro sa anang ueo ag pagkaduea it alintro.
Parehong gindaea ro daywang driver it mga rumespondeng katapo it Kalibo MDRRMO ag Bureau of Fire Protection (BFP) sa Aklan Provincial Hospital, apang ko ulihi hay binawian it kabuhi ro motorista. Samtang, nag-angkon man it mga nina sa eawas ro tricycle driver nga nauna eon nga ginpaidaeum sa hospital arrest.
