Ginbatikos ni Engr. Jun Agravante, presidente it Federation of Livestock, Hog and Poultry Raisers Association sa Aklan, ro Office of the Provincial Veterinarian (OPVET)-Aklan bangud sa gina-alegar nga kawad-an it random testing sa mga alagang baboy sa mga lugar nga ginadudahan nga may kaso it African Swine Fever (ASF).
Suno kay Agravante, nabudlayan sigon ro OPVET nga engganyuhon ro mga hog raisers, partikular sa banwa it Batan, nga magpa-test it dugo it andang mga alagang baboy para sa confirmatory testing bangud sa pagkabaeaka nga ipaidaeum sa culling ro mga raya kon magpositibo sa ASF.
Sa idaeum it national animal health protocols, pwedeng i-depopulate ro mga baboy nga may sintomas it ASF sa sueod it 500-meter radius halin sa kumpirmadong kaso.
Nagpanawagan man si Agravante sa local nga gobyerno it Aklan nga insigidang umaksyon agud nga maprotektahan ro hog industry sa probinsiya.
Ginhinyu man nana kay Governor Joen Miraflores nga magpaguwa it Executive Order para ipatuman ro national price ceiling it live hogs nga ₱210 kada kilo, sa baylo sa presenteng presyo nga una sa ₱170 hasta ₱190 kada kilo, agud nga indi man malugi ro mga naga-alaga it baboy.
Samtang, ginpahayag pa ni Agravante nga nagapabilin nga kapos ro suplay it karne it baboy sa Aklan bangud sa pag instrikto sa pagpasueod it mga baboy ag pork products kasunod it uman nga pagtuhaw it mga kaso it ASF sa mga kaiping nga probinsiya it Iloilo, Capiz, ag Negros Occidental.
Gin engganyo man nana ro mga hog raisers nga hugut nga sundon ro mga biosecurity measures, kaibahan ro pagbutang it trapal sa palibot it babuyan, regular nga pagdis-infect ag tamang pagpilak it mga kontaminadong kagamitan, samtang ginasueong ro pagpaeapad it random testing sa iba pang mga banwa sa probinsiya.
Sa makaron hay ginabo-oe pa it Bombo Radyo Kalibo ro parte it Office of the Provincial Veterinarian (OPVET)-Aklan angot sa nasambit nga mga alegasyon.
