Nagpadayon ro kampanya it Aklan Police Provincial Office (APPO) kontra sa ilegal nga droga, kriminalidad ag iba pa nga pag-eabag sa layi, base sa andang monthly operational accomplishment report tubtob Hulyo 15.
Suno kay Pcpt. Aubrey Ayon, tagapaghambae it nasambit nga taeatapan, nadakpan ro 18 ka wanted persons sa nagakaeain-eain nga operasyon sa probinsiya.
Nagapadayon man ro anti-illegal drugs operations, kaibahan ro buy-bust operation nga gipatigayon it Provincial Drug Enforcement Unit (PDEU) sa Altavas nga nagresulta sa pag-karesto it mga suspek.
Sa kampanya kontra ilegal nga armas, may mga nadakpan man sa law enforcement operations ag pinaagi sa pag-serbe it search warrants.
Nakarekober man ro kapulisan it 16 ka boluntaryo nga ginturn-over nga mga armas ag tatlong explosive device.
ahayag nana, padayon pa ro pagtipon it datos agud maikumpara ro crime statistics para sa buean it Hulyo kumpara Hunyo 2026 antes masayran kon nagtaas ukon nagnaba ro insidente it kriminalidad sa probinsiya.
Ginpabutyag man ni PCpt. Ayon nga nagaeaum sanda nga mapabilin nga drug-cleared ro probinsiya.
Padayon man nga ginapabaskog it kapulisan ro border control operations sa mga boundary it Aklan, partikular sa Altavas paadto it probinsya it Capiz ag sa Nabas-Buruanga paadto it Antique, agud mapunggan ro pagsueod it ilegal nga droga ag iba pa nga kontrabando.
Kabahin man it kampanya sa kalinong ag katawhayan, ginapadayon it APPO ro Safer Cities Program sa pakikipagbueuligan it mga lokal nga administrasyon, barangay ag iba pa nga ahensya agud mas mapatuman ro mga ordinansa ag mapabaskog ro seguridad sa mga komunidad.
