Ginkumpirma it Department of Energy (DOE) nga ro Pilipinas ro may pinakamataas nga sukot sa kuryente sa mga nasyon nga miyembro it Association of Southeast Asian Nations (ASEAN) matapos mag-abot sa P12.43 kada kilowatt-hour (kWh) ro average nga presyo it kuryente ko Hunyo. Mas mataas raya it P0.093 kada kWh kumpara sa Singapore.
Suno sa DOE, nagapangunang rason it mataas nga presyo ro kakueangan sa suplay it kuryente sa Visayas bangud sa 21 power plants nga naka-eksperyensiya it forced outage.
Bangud kara, nagasalig ro rehiyon sa suplay it kuryente halin sa Luzon ag Mindanao, samtang ro mataas nga demand ko tag-init hay nagduso man sa paggamit it mas mahae nga power plants agud nga malikawan ro brownout.
Samtang, uman nga nagtaas ro sukot it Manila Electric Company (Meralco), rason nga nag-abot sa P14.8621 kada kWh ro kabilugan nga residential rate makaron nga Hulyo.
Ginaboeobanta nga madugangan ro kapin sa P69 nga kada buean nga baeayran it sangka ordinaryong kabaeayang nagakonsumo it 200 kWh.
