Daywang adlaw nga ginsuspinde it lokal nga gobyerno it Altavas ro face-to-face classes sa tanan nga lebel ko Hulyo 21 hasta 22 matapos magkalhit sa social media ro mga report angot sa gina-alegar nga bomb threat.
Sa Facebook post ni Altavas Mayor Denny Refol Sr., ginpatuman ro nasambit nga tikang bilang pag-dahan agud nga masiguro ro kaeowasan ag seguridad it mga estudyante, manugturo, ag empleyado samtang padayun nga gina-usisa ag gina-beripika it mga awtoridad ro nasambit nga paeag.
Raya sigon hay base sa ginkasugtanan nanda it mga awtoridad ag Public School District Supervisor it nasambit nga banwa.
Sa baylo nga face-to-face classes, ginpatuman it mga apektadong eskwelahan ro Alternative Delivery Mode sandig sa sueundanan it Department of Education (DepEd).
Nauna eon nga ginsuspinde ro klase sa tanan nga lebel sa banwa it Altavas, agahon it Martes, Hulyo 21 matapos magkalhit sa social media ro sangka bomb threat, kun sa siin, gina-alegar nga target kara ro sa Altavas National High School.
Gin-abisuhan man ro publiko nga magpabilin nga kalmado apang mapagbantay ag alerto ag insigidang i-report sa mga awtoridad ro anumang makadueudang aktibidad.
Owa man it nakit-an nga pampasabog sa ginpatigayon nga inspeksyon it mga awtoridad.
