Ginhinyu ni Sen. Loren Legarda sa publiko nga indi magtau it bukon it rasonableng konklusyon angot sa anang medical leave ag pagbiyahe sa ibang nasyon.
Ginkumpirma ni Legarda nga nag-file imaw it pormal nga medical leave sa Senado umpisa Agosto 3 hasta 5, 2026, sandig sa mga patakaran it Senado.
Suno kana, indi dapat i-angot ro anang pagbiyahe sa mga “false and baseless” nga alegasyon nga angot sa imbestigasyon it Ombudsman.
Nauna eon nga ginpahayag ni Legarda nga owa pa sanda it nababaton nga opisyal nga komunikasyon halin sa Ombudsman angot sa gin-report nga preliminary investigation ag gin-insister nana nga owa it eakot nga pondo it gobyerno ag haum sanda nga ipaguwa ro kamatuoran.
Ginkumpirma it National Bureau of Investigation (NBI) nga si Legarda hay nag-agto sa France, samtang ro anang unga nga si Batangas Rep. Leandro Leviste hay nagbiyahe paagto sa Hong Kong.
Suno man kay Sen. Erwin Tulfo, nagpangayo it pahanugot si Legarda bago naghalin it nasyon rason nga owa imaw nakatambong sa ulihing pagpamati it impeachment trial.
Nagapangatubang ro mag-inang mamalidha sa mga reklamong plunder ag graft angot sa gina-alegar nga kapas-eawan it renewable energy company ni Leviste nga magtau it solar power sandig sa nakabaehag sa congressional franchise kara.
Ginpaathag ni Ombudsman Jesus Crispin Remulla nga gin-eakip si Legarda sa kaso bangud nga nabo-oe sigon ni Leviste ro prangkisa ko 2019, samtang si Legarda ro chair it Senate Finance Committee.
Nagpanindugan si Legarda nga malimpyo ro andang pangaean sa oras nga maiplastar eon ro kamatuoran.
