Nagpanindugan si Private Prosecutor Amando Ligutan nga owa imaw it may gin-eabag matapos nga nag-post imaw sa Facebook angot sa patakaran nga indi dapat pagpasugtan ro misleading questions bisan sa cross-examination sa impeachment trial.
Sa anang counter manifestation sa ika-19 nga adlaw it impeachment trial ni VP Sara Duterte, ginpahayag ni Ligutan nga ginhimo nana ro post ko Agosto 12 antes nag-adjourn ro trial apang nakibot imaw nga nangin kontrobersyal ro nasambit nga post nga nagbaton it reaksiyon sa social media, partikular sa legal community.
Ginpahayag pa kara nga bukon it personal ro anang post ag owa man imaw it gintumod nga pangaean ukon gintalakay nga merito it kaso.
Pahayag nana, bilang sangka manugturo, obligasyon nana nga i-korek kun ano man ro saea, ag owa raya it ginapili nga tiempo ag lugar.
Suno kana, nagakabaeaka imaw nga ro statement nga ginahimo sa open court nga ro misleading questions hay ginapasugtan nga indi makoreksyunan.
Dugang kara, ro pagkorek sa saea hay bukon it maeain ag bisan ro pagtama it saea hay owa man ginabawae maskin sa impeachment court.
Ro mas ginkabaeak-an sigon nana ag ro anang ginkadismaya hay ro owa pag-ako it Defense sa andang saea, ag, sa baylo, ginsaway pa nanda ro sangka abogado ag manugturo nga naghambae eang it insakto sa anang kaugalingon nga Facebook account.
Sabat pa nana sa panawagan it depensa nga dapat kunta hay nangin “humble” raya ag owa nag-post angot kara, ginpahayag nana nga nasayuran kara ro kahueugan it humility apang bukon it Defense team ro dapat magturo kara bangud sanda mismo sa Depensa ro kinahangean i-remind angot sa pagpa-ubos bangud sa owa nanda pag-ako sa andang saea nga pahayag sa korte.
