Lima hasta waeong tropical cyclone ro posibleng mabilg ukon magsueod sa Philippine Area of Responsibility (PAR) umpisa Setyembre 2026 hasta Pebrero 2027, suno sa PAGASA.
Sa outlook it state weather bureau, daywa hasta tatlong tropical cyclone ro pwedeng mailista makaron nga Setyembre, samtang sambilog hasta daywa man kada buean umpisa Oktubre hasta Disyembre.
Posible man ro hasta sa sambilog nga tropical cyclone sa Enero 2027, samtang maisot eamang ro posibilidad nga makaangkon it bagyo sa Pebrero.
Kadungan kara, nagpaandam ro PAGASA nga mas mataas ro posibilidad nga tumama ag magtabok sa nasyon ro mga tropical cyclone sa ulihing parte it dag-on bangud sa ordinaryong hueag it mga bagyo sa tiempo it “ber” months.
Sa pihak kara, pwedeng maimpluwensiyahan it naga-eontad nga El Niño ro ordinaryong hueag ag pagbilog it mga bagyo.
Ginaeauman man ro padayun nga pagnaba it kaabuan it uean sa maabu nga parte it nasyon sa masunod nga mga buean bangud sa El Niño.
Suno sa PAGASA, posibleng maka-eksperyensiya it below-normal rainfall ro pilang parte it Luzon sa Setyembre, samtang ginaeauman nga magaeapad ro rainfall deficit sa Luzon, Visayas ag pilang parte it Mindanao pag-abot it Oktubre ag Nobyembre.
Maskin nga pwedeng magdaea it makadali nga pagtaas it uean ro mga maga-agi nga tropical cyclone, ginaeauman nga magapabilin ro epekto it El Niño hasta sa unang katunga it 2027.
Ginalaygayan ro publiko nga padayun nga subaybayan ro mga opisyal nga abiso it PAGASA bangud nga pwedeng magbag-o ro aktuwal nga numero, kabaskog ag direksiyon it mga tropical cyclone.
