Madinaeag-on nga ginpatigayon it Brgy. Guinbaliwan sa banwa it New Washington ro andang pang-tatlong dag-on eon nga Ms. 4Ps Universe.
Suno kay Punong Barangay Leah Ramirez, raya hay ana mismong inisyatibo bilang baeos sa mga 4Ps beneficiaries sa andang pagiging aktibong kabulig it barangay sa nagkaeain-eain nga programa.
Dugang pa kara, tuyo man sigon nana nga mataw-an it kahigayunan ro mga raya para nga mapakita ro andang kapasidad ag mapa-umwad ro andang kumpyansa sa andang sarili.
Paathag ni Kap. Ramirez, masami nga gina-down it mga raya ro andang kaugalingon nga kapasidad bangud sa pagiging myembro it nasambit nga programa.
Nagpartisipar kara ro kabilugan nga 12 ka mga kandidata edad 13 hasta it 18-anyos maghalin sa nagkaeian-eain nga sitio it nasambitan nga barangay.
Paathag dugang ni Kap. Ramirez nga tuyo nana nga padayunon ro mga programa para sa mga benepisyaryo ag naga-eaum imaw nga magapadayon raya maskin nga bukon eon it maw ro magiging lider it barangay sa paaeabuton.
samtang, masadyang ginpakigbahin ni Rea Jane Lachica, ro nakakuhit it korona sa nasambit nga pageant ro anang naging eksperyensya.
Suno kana, raya ro anang naging training ground para nga maka-angkon it kumpyansa sa anang sariling kapasidad.
Tuyo sigon nana nga maging responsableng lider sa iba pang kabataan it andang barangay gamit ro titueo bilang Ms. 4P’s Universe 2026.
