Mabahoe nga bagay para sa mga drug war victim ro personal nga pagtambong ni dating Presidente Rodrigo Duterte sa pagpamati it International Criminal Court (ICC) matapos ro masobra sang dag-on ko Setyembre 16, 2026.
Suno kay Bagong Alyansang Makabayan ukon Bayan Aklan provincial coordinator Kim Sin Tugna, makabig raya nga improvement sa ginapangatubang nana nga kasong crimes against humanity agud nga maangkon eon it mga biktima ro hustisya sa anang naging maeapnagon nga kampanya kontra sa illegal nga droga.
Dugang pa ni Tugna, uwa it rason nga inde magtambong sa mga pagpamati it ICC si Duterte bangud nga maskin ro mismong doktor sa anang pasilidad sa The Hauge, Netherlands nagahambae nga masarangan it dating presidente nga mag-atubang sa mga prosecutors ag magsabat sa mga pagbista kana.
Nasayuran nga uman nga nakit-an it publiko sa livestream it ICC si Duterte sa pag-umpisa it status conference hearing matapos ro masobra sang dag-on nga pagkadetini nana sa pasilidad it ICC.
Madumduman nga nauna eon nga ginkansela it ICC ro nakataeana nga status conference ko July 14 angot it kasong crimes against humanity kontra kay Duterte matapos hambaeon it hukuman nga uwa pa it isyung nagakinahang-ean it insigidang pagtalakay bago ro pagbista.
