KALIBO, Aklan — Nagapanawagan si Aklan State University (ASU) President Dr. Jeffrey A. Clarin it klaru nga plano kun siin pagaboe-on ro dugang nga pondo para sa mga state universities and colleges (SUCs).
Raya hay kasunod it pagbisita ni Kabataan Partylist Representative Renee Co sa anang taeatapan, kun sa siin naistoryahan sigon nanda ro isyu angot sa pondo para sa mga SUCs.
Suno kay Clarin, madali nga hambaeon nga dapat dugangan ro budget it mga SUCs, apang importanteng mapaathag man kun siin pagaboe-on ro pondong pagagamiton para kara.
Ginsaysay sigon nana sa kongresista nga base sa andang budget proposal ag National Expenditure Program, 0.18 percent eamang it andang ginapangayo nga pondo para sa capital outlay ro gintaeana it Department of Budget and Management (DBM).
Bangud kara, owa pa it sang porsiyento ro andang capital outlay budget, rason nga owa eon haeos sanda it pondo para sa maskin repair and maintenance .
Ginpahayag pa ni Clarin, nagpromisa si Co nga magabulig agud nga indi mabawasan ro pondo it ASU.
Sa pihak kara, ginpaabot nana nga sanda eon lang ro nagahimo it pamaagi kun paalin nga ma-manage ag mapa-igo ro pondong gintaeana kanda DBM para masuportahan ro pagkinahangean ag development it eskwelahan.
Gin-engganyo man nana ro mamalidha nga maghimo it nagakaigo nga tikang sa Kongreso agud nga masiguro nga indi mabawasan ro pondo it mga SUCs.
