Magapadayun sa agahon it Disyembre 1, adlaw nga Martes, ro impeachment trial ni Vice President Sara Duterte matapos nga owa it nakataeana nga pagbista sa masunod nga domingo.
Ginaeauman nga magabalik ro Senate Impeachment Court sa pagpamati sa nasambit nga petsa kasunod it temporaryong pagpundo it pagbista.
Mag-eowas kara, igabalik sa half-day schedule ro trial hasta sa bilog nga buean it Disyembre.
Suno kay Senate Impeachment Court spokesperson Atty. Regie Tongol, pagahiwaton ro trial umpisa alas-10 it agahon hasta alas-3 it hapon bangud nga magapadayun sa gihapon sa hapon ro plenary sessions it Senado bilang legislative body.
Sa pihak kara, target sa gihapon it Impeachment Court nga matapos sa Disyembre ro presentasyon it mga testigo ag ebidensya it defense team.
Nakataeana sa Disyembre 9 hasta 11 ro pagsumite it formal offer of evidence ag mga komento ag objections it magtimbang nga parte.
Samtang, target man sa Disyembre 14 ag Disyembre 16 hasta 18 ro pag-usisa sa mga ebidensya, oral ukon closing arguments, ag roll call vote.
Apang engkaso nga indi matapos ro pagbista sa gintaeana nga tiempo, pwedeng magdugang it mga adlaw sa Disyembre ukon Enero, depende sa magiging desisyon it Presiding Officer.
Ginklaru ni Tongol nga nakadepende sa gihapon ro target nga pagtapos sa posibilidad it rebuttal ukon surrebuttal halin sa magtimbang nga parte.













