-- ADVERTISEMENT --

Gindaea sa ospital ro dating Pangueo it Brazil nga si Jair Bolsonaro matapos maka-eksperyensiya it grabeng pagpaeanakit it tiyan ko Biyernes.

Suno sa anang unga nga si Carlos Bolsonaro, nakaangkon it pagbara sa tina-e it 71-anyos nga dating lider.

Base sa report, naka-eksperyensiya si Bolsonaro it abdominal distension ukon paglobo it tiyan ag presenteng nagapaidaeum sa eksaminasyon.

Ginpahayag ni Carlos nga ginataw-an ro anang ama it bueong kontra sa sakit ag ginatinguhaan nga boengon ro kondisyon pinaagi sa paunang medikal nga tikang agud nga malikawan ro operasyon.

Makapilang beses eon nga naospital ag nagpaidaeum sa operasyon si Bolsonaro umpisa nga mabun-an sa tiyan samtang nagapangampanya ko 2018.

-- ADVERTISEMENT --

Presenteng ginaserbihan ni Bolsonaro ro 27-anyos nga sentensiya bangud sa pagkaeakot sa hana nga kudeta matapos mapiyerde sa eleksyon ko 2022. Ginpaidaeum imaw sa house arrest bangud sa isyung medikal.

Ginabasoe man ni Carlos ro pagkakulong it anang ama sa gina-alegar nga pag-grabe it kondisyon it anang ikamayad nga eawas bangud sa kawad-an it bastanteng paghueag ag ginasugid nga psychological nga pag-antus nga anang naeksperyensiyahan.