KALIBO, Aklan—Ginklaro ni Malay Mayor Frolibar Bautista nga ginahueat eon lang it lokal nga gobyerno it Malay nga aprubahan it Provincial Inter-Agency Task Force ag Regional IATF ro andang ginpasa nga resolution nga ipaidaeom sa antigen test ro mga Aklanon nga nagasueod sa isla it Boracay.
Kasunod man kara ro anang pagklaro nga ro mga turistang maghalin sa ibang lugar hay magapabilin sa gihapon nga sambilog sa mga requirements ro negatibong resulta it RT-PCR test.
Samtang kaibahan man sa mga iga-require it antigen test hay ro mga workers, Authorized Persons Outside Residence (APOR) ag local tourists.
Ginklaro man ni Bautista nga bukon it sakop sa natungdan nga kasuguan ro mainland Malay bangud raya hay para eamang sa mga magatabok it Boracay.
Raya hay kasunod it pag-re-classify sa Aklan nga ipaidaoem sa Modifed Enhanced Community Quarantine (MECQ) classification bangud sa pagtinaas it kaso it Coronavirus Disease 2019 ukon COVID-19.
Engkaso nga maaprubahan, ro testing hay pagahiwaton sa Brgy. Caticlan kun siin may accredited Antigen test system.
Matueopangdan nga nagapabilin sa GCQ with heightened restriction ro Aklan hasta Hulyo 22 base sa anunsyo it National IATF.
Dugang pa it alkalde nga antes pa mag-grabe ro sitwasyon dapat nga may protective measures eon nga mai-presenta ro Boracay agud nga indi raya maeakip sa MECQ.
Samtang, ginpahayag man ni Mayor Bautista nga target it lokal nga gobyerno nga makaabot it 40 percent it tourist arrivals makarun sa Isla it Boracay sa tunga it ginapangatubang nga pandemya.
Dugang pa kara nga sa makarun hay naka-record eamang it masobra sa 1,000 ka mga turista sa Isla nga maeayo sa gihapon sa nailistang 6,000 kada adlaw antes pa nga nagtuhaw ro pandemya.
