KALIBO, Aklan—Ginpaathag ni Aklan 2nd District Congressman Teodorico Haresco nga ulihi eon imaw nakabaton it imbitasyon sa ika-100 days accomplishment report ni Governor Joen Miraflores rason nga owa nakatambong.
Suno kana nga owa sanda it nabaton nga invitation kundi nga text message eamang halin sa taeatapan it gobernador.
Medyu ginlaygayan man kara ro gobernador nga kunta pilang adlaw antes ro event hay kinahangean nga may nagakaigo eon nga preparasyon eakip ro pagtau it invitation agud nga maskin paalin hay mataw-an it importansiya ro mga ginkangay nga bisita.
Samtang, ginklaru man nana ro mga nagtuhaw nga report nga “no show” imaw sa event matapos nga gina-alegar nga ginhambaean it sangka matag-as nga opisyal it probinsiya nga sampid eamang imaw sa partidong tibyog.
Sa atubang kara, anang ginlitanya ro mga proyekto nga hinimuan sa probinsiya nga pilit sigon nga ginasakyan it Partidong Tibyog.
Madumduman nga nag ugat ro owa pagka-ilintindihan matapos nga ideklara it sangguniang panlalawigan it Aklan bilang mga persona non-grata ro ap-at nga kongresista halin sa Bicol nga owa nakasayod sanday congressman Haresco ag Carlito Marquez.
Ro aksyon it 4 nga kongresista hay nagpaakig sa provincial board matapos nga magdihon it proposed bill nga ro isla it Boracay hay ipaidaeum sa kontrol it national government.
