KALIBO, Aklan—Nagaeaum si Aklan governor Joen Miraflores nga magadere-deretso eon ro pagbaskog it turismo sa isla it Boracay ag maabot ro pre-pandemic arrivals.
Sa anang report sa unang 100 days sa pwesto, amat-amat eon suno kana nga nagabangon ro ekonomiya halin sa pandemya, kun sa siin nabatyagan ro pagbaskog it turismo sa isla matapos nga naabot eon ro 1-million mark nga tourist arrivals makaron nga 2022.
Kasunod it paghaeuga sa mga ginapatuman nga restrictions, maabu eon nga mga domestic tourist ro nagpa-book agud nga magbakasyon.
Bukon eamang ro mga negosyante ro malipayon kundi ro mga empleyado nga nagbalik trabaho eon.
Nakaangkon eon man suno kana it international flight halin sa South Korea ag posibleng sa iba pang mga nasyon sa masunod nga mga binuean.
Sa pihak nga parte, nakasalalay eon suno kana sa lokal nga gobyerno it Malay kon paalin nga mapabilin ro kalimpyo ag kaayusan it Boracay pagkatapos nga ginpaidaeum raya sa rehabilitasyon.
Gindugang pa nga maabu man ro nagka-interes nga magbakasyon sa isla sa ginpatigayon nga Philippine Travel Mart ko nagtaliwan nga domingo nga gin-organisa it Philippine Tour Operators Association (Philtoa) kun sa siin nagpasakop ro provincial government.
Sa pihak nga parte, bangud sa ginaeauman nga uman nga pagdagsa it mga turista sa Boracay, kumpiyansa si governor Miraflores nga magabaskog man ro agrikultura sa probinsiya.
Ginpromisa kara nga pagataw-an nanda it assistance pinaagi sa bulig pinanisyal ag nagakaigo nga training ro mga mangunguma ag mangingisda sa Aklan agud nga makasarang nga magtau it mga kinahangeanon nga pagkaon sa isla.
Raya hay pinaagi sa bulig it agri-aqua demonstration farm and training center sa barangay Nalook, Kalibo.
