KALIBO, Aklan—Nakalista ro Aklan Provincial Epidemiology and Surveillance Unit (APESRU) it PHO it kapin sa 296 katawo nga nagkasakit it dengue sa bilog nga probinsya it Aklan halin ko buean it Enero hasta ko buean it Hunyo 2020.
Sa nasambit nga numero, daywa eon ro namatay.
Suno kay Provincial Health Officer 1 Dr. Cornelio Cuatchon Jr. nga bukon eamang it pandemya ro andang ginabantayan sa makaron nga panyempo kundi ro posible man nga pagpanaeasa it sakit nga dengue.
May kaangtanan kara, nagpadumdom sa publiko si Dr. Cuatchon nga inde pagbaliwalaon ro simpleng eagnat, ubo, sipon ag rashes sa eawas bangud nga raya ro mga sintomas nga makit-an sa tawo nga may dengue.
Mas makapamayad suno kana nga ro tanan hay magpanglimpyo sa palibot ag ipractice ro 4S nga ginakeakipan it search and destroy ukon pag-usoy ag pagsamad sa mga ginapamugaran it eamok; seek early consultation ukon insigidang magpacheck-up sa doktor partikular kon may nabatyagan nga sintomas it sakit; self protection measures ukon proteksyunan ro kaugalingon kontra sa sakit kaparehas it pagsuksok it mga light colors nga eambong ag ro may mga mahaba nga butkon; kamana man say yes to fogging ukon suportahan ro mga pausok nga ginapatigayon it health authorities sa komunidad engkaso nga may una nga paeag ukon outbreak it dengue.
