KALIBO, Aklan — Nagpangayo it pasaylo ro Aklan Police Provincial Office (APPO) sa pamilya ag mga amigo it pinatay nga beteranong journalist nga si Johnny Dayang sa gintuga nga kalituhan ukon pagtaeang sa paggamit it kataga nga “case cleared” it Kalibo Municipal Police Station angot sa pagpatay sa nasambit nga mamamahayag.
Suno kay P/Capt. Aubrey Ayon, tagapaghambae it APPO nga nakaangkon eamang it owa pagka-ilintindihan sa termino nga ginagamit sa police procedure.
Raya hay nag-ugat sa pahayag ni P/Maj. Frenzy Andrade, hepe it Kalibo MPS nga ginakabig eon nanda nga case cleared ro insidente it pagpatay kay Dayang.
Ko Hunyo 6, nagpaguwa it pahayag ro pamilya Dayang angot sa andang pagkadismaya sa ginakabig nanda nga premature nga deklarasyon nga ro nasambit nga kaso hay cleared eon.
Ginklaru ni Capt. Ayon nga magkaiba ro kahueugan it case cleared ag case closed.
Ginagamit sigon ro case cleared kon maskin sambilog sa mga suspek hay nakilaea eon ginkasuhan sa korte bangud sa bastante nga ebidensiya.
Naintindihan sigon nanda ro baeatyagon it pamilya ag ro insidente hay magiging leksyon eon sa PNP nga ipaathag it husto ro mga police terminology nga andang ginagamit.
Sa pihak nga parte, ginpaabot ni P/Capt Ayon nga mag-eowas sa ginhingaeanan nga suspek, may daywang iba pa ro andang ginkasuhan angot sa murder case ni Dayang.
Ro daywang dugang nga kaeaeakin-an nga ginkasuhan hay nakita sa CCTV nga naga-surveillance sa baeay it journalist.
Puro mga pangayaw sigon ro mga raya ag ginapatihan nga mga hired killer.
Sa makaron hay padayun ro maid-id nga imbestigasyon it Kalibo MPS ag Special Investigation Task Group Dayang agud nga madakpan ro gunman ag matumod ro mastermind kamana man nga masayuran ro motibo it pagpatay.
Madumduman binaril-patay si Dayang samtang nagatan-aw it TV sa sueod it andang baeay sa Brgy. Andagao, Kalibo ko gabi-i it Abril 29.
