KALIBO, Aklan—Naipaabot eon it Aklan provincial government sa National Irrigation Administration ukon NIA ro problema it mangunguma partikular ro kawad-an it tubi sa andang mga kaeanasan.
Suno kay Governor Jose Enrique Miraflores, ginatinguhaan sigon it ahensya nga mapondohan ro konstraksyon it nasamad nga dam sa may bahin it Sigcay, Banga.
Naghimo eon man it re-channeling it tubi apang bukon gihapon it bastante ukon manaba ro lebel it tubi sa Aklan river.
Sa consultative meeting nga ginpatigayon, ginpahayag ni governor Miraflores nga nagpangayo it short term solution ro asosasyon it mangunguma pinaagi sa pag-angkon it solar water pump.
Napamatud-an sigon nga epektibo ro solar water pump as long as nga may source it tubi.
Angot kara, kapin sa 5 milyon pesos nga supplemental budget ro igataeana para makabakae it mga solar water pumps nga igatao sa mga mangunguma.
Nasayuran nga nagakabaeaka makaron ro mga mangunguma bangud sa kawad-an it tubi sa mga kaeanasan rason nga uwa sanda nakauma makaron nga cropping.
