KALIBO, Aklan—Nasubuan si Sangguniang Panlalawigan member Jay Tejada bangud nga hasta sa makaron hay owa pa it sabat ro anang ginpadaea nga resolusyon nga nagapanawagan kay presidente Ferdinand Marcos Jr., nga magpatunga eon agud nga magapabilin sa mga katutubong ati sa isla it Boracay ro parsela it eugta nga gintau kanda ko tiempo it Duterte administration.
Suno kana nga bilang chairman it committee on indigenous peoples nga owa sanda nagapundo agud nga maprotektahan ro integridad it Certificate of Land Ownership Awards ukon CLOAS nga gin-grant sa mga pamilya it ati ag mabatian ro andang concern.
Mag-eowas sa taeatapan ni pangueong marcos, nagpadaea man sanda it kopya it nasambit nga resolusyon ro National Commission for Indigenous Peoples ukon NCIP agud nga maeakip sa andang case study ag incident report.
Uman nga nagpaabot it pagkabaeaka ro Ati community sa Boracay matapos nga nakaangkon eon it physical take-over ko nagtaliwan nga mga inadlaw matapos nga sudlon it mga armadong grupo ro ginabawi nga eugta it sangka property developer .
Nagakabaeaka sigon si board member Tejeda sa mga nagakatabu bangud nga maskin nga owa nakasayod ro mga katutubong ati hay may nakapaskil eon sa lugar nga kanselado ro andang CLOA rason nga nakaangkon it automatic take-over kun sa siin pilit nga ginbutangan it kurae ro property it mga pribadong security guards.
Nagpanindugan si Tejada nga samtang may ginabuytan nga CLOA ro mga pamilya it ati hay indi sanda basta-basta nga mapahalin sa lugar.
Sa pihak nga parte, sa ginpatigayon nga session ko Lunes , nagdesisyon sigon ro anang komitiba kaibahan ro committee on rules, laws and ordinances nga magpasa it joint resolution nga uman nga magapatigayon it legislative inquiry agud nga magpatigayon it fact finding angot sa legalidad it pag-take-over sa property ukon pagpahalin sa mga ati sa lugar.
Paga-imbitahan kara ro Department of Agrarian Reform ukon DAR-Aklan ag andang regional office, PNP , ati community, stakeholders ag iba pang natungdan nga ahensiya it gobyerno.
Posible sigon nga ma-schedule nanda ro inquiry sa unang domingo it Abril.
Ginabawi suno kana ro eugta bangud sa alegasyon nga bukon raya it unsuitable ukon nagakabagay para sa agricultural production.
