KALIBO, Aklan—Uman nga nagapahaum ro Aklan secondary boys baseball team para sa nakataeana nga pagsabak sa Palarong Pambansa sa maabot nga Hulyo 6 hasta 17 sa Cebu City.
Ro nasambit nga team nga nag-representar sa aklan sa bag-o eamang natapos nga Western Visayas Regional Athletic Association ukon WVRAA meet 2024 nga ginaeakipan it 12 nga mga players hay puro naghalin sa Altavas National High School.
Naghimo ro mga raya it kasaysayan bangud nga sa unang kahigayunan hay napierde it team aklan ro power house nga Iloilo ag Negros Occidental.
Sa championship match hay naangkon nanda ro kadaeag-an kontra sa Negros Occidental sa score nga 10 to 5.
Suno kay Ryan Ropa, head coach it baseball team secondary boys nga hugut nga preparasyon ro andang paga-obrahon eabi pa ag mga bigatin nga team halin sa nagkaeain-eain nga rehiyon ro andang makasambuwa sa Palarong Pambansa.
Mabahoe man ro anang pagpasaeamat bangud sa pihak it mga pagsuhok hay owa naapektuhan ro andang performance.
Ginsaysay nana nga samtang nagasabak sa wvraa hay na ospital ro anang unga bangud sa thyphoid fever ag pneumonia.
Ginpasiguro man nana nga paga-obrahon nanda ro tanan bangud nga ro pagsabak sa palarong pambansa hay manami nga exposure sa anang mga players ag tumaeagsahon nga kahigayunan nga iga represent ro Western Visayas region sa kapareho ka prestihiyoso nga tournament .
Pagagamiton sigon nanda ro masunod nga pilang domingo ag binuean agud nga makapahaum para sa palaro ag indi nanda gusto nga i-disappoint ro rehiyon rason nga pagahimuon nanda ro tanan sa kutob sa andang masarangan.
